مش لازم

مش لازم...

مش لازم اكون شاعر علشان أكتب ,

 ولا لازم اكون رسام علشان أرسم ,

 كفاية إني بتخيل وبقدر أحس بالحاجات .

 مش لازم تبقى زيي علشان أكلمك ,

 ولا لازم تبقى شبهي علشان أصاحبك,

كفاية أن ليك قيمة علشان أنت نفسك .

مافيش حاجة لازم تكون لازم..

 إحنا اللي بنحدد لنفسنا إطارات ونعيش جواها,

لحد لما نتخنق ويبقي نفسنا نكسرها...

 رغم ان احنا اللي حاطينا نفسنا فيها من الأول,

زى مثلا :

لازم نجيب درجات كبيرة في الدراسة ،

 لازم ندخل كلية كويسة حتى لو مش بنحبها ،

 وكتيير من الحاجات في حياتنا اللي قلنا إنها لازم بس لو فكرنا شوية هنلاقي انه مش لازم...

Sarah

24-12-2013

لحظات

لحظات... 

لا شئ يضئ هذه الحياة سوى بعض اللحظات,

اللحظات التي نرتد فيها إلى طفولتنا وبرائتنا,

ونشاهد الحياة في بكارتها ونظافتها وعذريتها,

من قبل أن تدنسها الكلمات و المصالح,

قبل أن يدنسها حب الذات والأنانية,

قبل أن يفسدها الحقد والغيرة,

قبل أن يتخللها خذلان البعض لنا,

قبل أن يتركونا في منتصف الطريق,
تلك اللحظات التى تترفع فيها النفس

عن كل ما هو إنساني ,

و تسمو لكل ما هو روحاني,

اللحظات التى نكون فيها على الفطرة

التى جبلنا عليها
بكل ما بها من براءة وطهر ونقاء...

Sarah

9-12-2013

Ying Yang!!

 ينج يانج.. فلسفة صينية بتشرح ازدواجية كل ما هو موجود في العالم المحيط بينا سواء كانت مادية او معنوية بس اكتر معني ركزت عليه الفلسفة دي كانت قيمة الخير والشر.

اللون الأبيض بيرمز للخير واللون الأسود بيرمز للشر والنقطة السودا جوه الابيض هي جزء من الشر موجود في الخير والنقطة البيضا جوه الأسود هي الخير اللي جوه الشر وده معناه ان مافيش اي حاجة مطلقة ؛ ولا في خير مطلق ولا شر مطلق ...

حتي مشاعرنا عمرها مابتكون ثابتة ، دايما في اكتر لحظة فرح بنلاقي جوانا حزن ، وجوه اقسى لحظة حزن بنلاقي حاجة تفرحنا اللي ممكن مثلاً تكون ان في حد جنبنا بيشاركنا الحزن ده...

احساس الحب تجاه اي شخص بنحبه بتيجي لحظة بنحس اننا حتي مش متقبلين الشخص ده وممكن شخص نكون مش حابينه بس في وقت نحس ناحيته بنوع من انواع الرحمة او الود...

وقت الجوع احيانا بنحس بالشبع ...

وف عز البرد ممكن نحس بدفا ...

لما بنضحك بنلاقي في عينينا دموع ...

واحنا بنبكي ممكن نبتسم ...

التناقض والأزدواجية في المشاعر هما اللي بيخلقوا الصراع اللي بنعيشه وهما اللي بيخلونا لازم نختار احنا عايزين ايه ؛ هنمشي في الطريق الإيجابي ولا الجزء السلبي هيطغى علينا ونستسلم له ...

و في نفس الوقت الأزدواجية دي هي برده اللي بتساعدنا نخرج من اي احساس سلبي بسبب نقطة الأبيض اللي جواها ؛ اللي بتفكرنا ان في حاجة تانية غير اللي احنا حاسينها احلى منها وتستاهل اكتر انها تتحس ...

والصراع ده هو اللي بيخلي الحياة ليها ايقاع وحركة مش ماشية على وتيرة واحدة و بيخلينا نفكر ونعرف ان لكل حاجة جانب تاني يمكن مكناش واخدين بالنا منه ...

وقتها بيجي الاختيار وساعتها ممكن حياتنا كلها تتغير وتتقلب وتروح في سكة تانية غير اللي كنا ماشيين فيها...

و بنلاقي نفسنا اتبدلنا من حال لحال ...

و وارد جداً نلاقي نفسنا رجعنا تاني لحالنا اللي فات وتفضل على كده الحياة بين خير وشر ، حب وكره ، فرحة وحزن ، ضحك ودموع ، قلق و إطمئنان ، قوة وضعف ، او اي مشاعر موجودة بنحس بيها هي وعكسها اللي بيظهرها اكتر ويوضح معناها ... ويدي لحياتنا طعم ولون وحركة وحياة :)

Sarah 

17-10-2013

مغرور

يمكن اكون مغرور بس بيحبوني

غروري هو سبب انهم يلاحقوني

عارف دي قلة ادب بس خلوني

اثبت لكل الكون ان الغرور لوني

اصل الغرور ده طبع بيشد كل البنات

وكل واحدة منهم تتخيل الحكايات

 ويمكن كمان تحلم تعيش في تبات ونبات

وبكلمة واحدة مني اقدر اهد الحلم

واقدر افهمها ان كل ده كان فيلم

وكل اللي في خيالها عمره ما هيكون علم

ورغم ده كله لسه في برده كتير

عايشين في الأوهام مع سراب بيطير

ومنهم اللي مستني واللي بعد عني

لكن مافيش منهم قدرت تفارقني

Sarah

27-7-2013

...ملل

الملل يكمن في ديناميكية الزمن وستاتيكية الأحداث...

                            

Sarah

23-7-2013

إزاى بقدر افرح

إزاي بقدر أفرح في أكتر وقت مليان أحزان
وليه بحزن لما يكون الوقت بالفرح مليان
إزاي بخاف رغم وجود الأمان
ولكن رغم الخوف بحس باطمئنان
إزاي الضحكة بتطلع من جوه قلب موجوع
وليه الدمعة بتلالي في الفرحة من غير رجوع
دايماً مع الصبر استعجال
ودايماً محدش عاجبه الحال
كل اللي بنحس بيه دايما يكون معاه ضده
و كل اللي بنتمناه دايماً بيحصل عكسه
يمكن ده طبع الحياة ؟
ولا ده المعني اللي تاه ؟

Sarah

25-6-2013