عادي!!

من كتر ما الوجع بقى بزيادة

وحتى القهوة بنشربها سادة

جوه قلوبنا عششت البلادة

وكأن الفراق بقى العادة

لا بقينا قادرين نصرخ ولا نبكي

ولا حتى قادرين من الهم نشكي

وندور على حد معاه نفضفض ونحكي

يمكن يزول الهم ويسيبنا ويجري

أو يمكن يطبطب على قلوبنا الموجوعة

او يهون بكلمة على نفسنا المفجوعة

ونرتاح شوية بكام كلمة مسموعة

أو حتى نعرف إننا في الوجع مجموعة

Sarah

17-11-2014

نقطة نور

نقطة نور على الاسفلت 

توضح سكة مخفية

وحبة مية مرمية على شجرة

تعيد ليها حياة تانية

و نقطة نور في القلب من جوه

تنور حبة من الضلمة

وحبة عدل ومحبة

تهون ضحكة الظلمة

ولسه الصورة مش واضحة

ولسة القصة مش كاملة

لكن فى يوم لازم

تنور شمس عالعتمة

وتكتب فى اخر الورقة

دى تامة وكاملة مكتملة

Sarah

11-11-2014

يا مركب

يا مركب تايهة على الشط إمتى تحسي إنك راسية؟

لو رسمولك خط السير برده هتعملي نفسِك ناسية

مانتيش طايلة البر وهادية ولا إنتِ سارية في الميه الجارية

عارفة طريقك ولكنك خايفة.. شايفة طموحك ومانتيش طايشة

شقي طريقك وإكسري خوفك، روحي لهدفك نوري ليلك

حققي حلمك و إرضي طموحك، خلي الكل في نَفسه يشوفك

عدي في نص البحر وعرضه وشراعك هيأمنك غدره

والتجديف هيقويكي ويوريكي إنك قادرة على أمواجه

والشط هيرجع من تاني والبر هيظهر قدامك

هتتوه التوهة من شطك وهترسي عالبر الآمن

Sarah

7-11-2014