أول مرة أسهر للصبح بس مبقاش مركزة مع الشروق و لا مستنية أشوف الشمس وهي بتطلع.. النهارده كان full moon عشان كده فضلت مركزة مع القمر اللي فاضله شوية وهيمشي وهيجي بكرة ناقص منه حتة عشان ده أخر يوم في أيام تمامه.. ورغم إن السما منورة إلا أنه مرضيش يمشي غير لما الشمس تيجي وتنور وتثبت وجودها في وسط السما.. كأنه بيطمن عليها إنها وصلت مكانها وإبتدت يومها وهتكمل مسارها الطبيعي وكل ما تنور أكتر هو بيختفي حبة حبة لحد ما يروح ينام ويجي تاني يوم قبل الغروب بشوية يسلم عليها مرة تاني قبل ما تمشي ويشكرها على النور والدفا طول اليوم ويقولها أنه هيكمل مكانها لحد ما تيجي تاني يوم ويوعدها أنه هيستناها ومش هيمشي غير لما يطمن عليها...
ورغم إن حتى نوره هو إنعكاس نورها بس هو برده مميز وليه خصوصية مش نسخة منها ؛ نوره أهدى وتقدر تبصله من غير ماتتعب كأنه بيدينا الفرصة نشوف نور الشمس بعيونا وكمان بيدينا فرصة إننا نشوفه بأشكال وأحجام مختلفة من أول ما بيتولد هلال لحد ما بيرجع تاني هلال وباللي بينهم.
بيختلف شكله وحجمه على مدار رحلته لكن اللي عمره ما بيختلف هو وجوده جنبها كل يوم في نفس المواعيد وهو بيستقبلها و لما بيودعها...
Sarah
4-7-2015
4-7-2015
