12-12-2012 :) :)

نـاس كـتـيـر عـنـدهـا هـوس الـتـواريخ المـمـيـزة واللـى بـتكون فـيـها أرقـام كـتـيـر شـبه بعـض- ولـحـد وقـت قريـب أوى كـنـت من الـناس دى-  وكـنـت بـفـضـل أسـتـنـى فـى كـل مـرة يـكون فـى تـاريخ مـن التـواريخ دى كـنــت بـسـتـنى أنه يكون يوم مميز أو تحـصل فيه حـاجة مخـتلفة ..صحيح التـاريخ شكله بيبقى حلو  لكن دايما كان اليوم بـيـمـر عـادى جـدا ولا بتـفرق الأرقـام المـتـرتـبة حلو جنب بعـض .. عادى زيـه زى أى يـوم طـبـيعى.. أنا شـخـصيـا كـان عـنـدى أحداث كتـيـيـيـيـر مـميـزة فى حيـاتى بس عـمرهـا ما كـانت فى تـاريخ من الـتـواريخ المـميزة دى أيـام أرقـامـها مـش شبه بعـض و يمـكن صـعب تتـحـفـظ لـكن الحدث دايـما  هـو اللـى بيـفـرض نفـسه عالـتاريخ و هو اللـى بيخـلـى اليوم مميز مش العكـس أبداً.. وعـشان الأحـداث دى كانت ممـيزة بالنـسبة لـى لـسه فـاكـرة كـل الـتواريخ بـتـاعـتها...عمر التاريخ مـهـما كان شكله حلو ما هيخلى اليوم مميز أو لا المهم أيه اللى بيحصل فى اليوم , و أيه اللى هنفضل نفتكره و عمـرنـا مـا هنبقى عايـزيـن ننـسـاه .ـ

إيه ذنبى ؟

  إيه ذنبى اعيش فى الضلمة? وانا اصلا مكانى النور!!!

  إيه ذنبى اعيش محبوسة ? وانا قادرة اعدى السور!!!

Captured by: Remon Magdy

Written by: Remon & Sarah

08-08-2012

http://www.facebook.com/Photo.Color.Of.life

ذكريات

ذكريات

مش كل ذكرى بتكون جميلة بس دايما بتكون مفيدة  

ممكن فى وقت معين تكون رسايل عشان نعرف نكمل باقى الحياة وهى جوانا

وممكن تكون دروس نتعلم منها عشان منكررش نفس الغلط تانى 

ومهما طال الزمن لازم نرجع نفتكرها تانى

و فى الوقت المناسب ممكن برده نعيشها تانى

Sarah

10-05-2012

صندوق

صندوق

صـــنــــدوق المــــــاضـــى

 صـــنــــدوق الــذكــريـــات

أوقــات بــفـتــحـه بـمـزاجـى

 أو غـصـب عـنى سـاعــات

أوقــات أزود فيه حــاجــات 

 وسـاعـات برمى منه حـاجـات

و سـاعــات بعيش جواه مع الحـاجـات

Sarah

10-6-2012

جوايا

جوايا

جوايا فـرحة وخوف وألوان

 جوايا حـيرة وقلق وأمـان

 جوايا غـيرة وحـب وحنـان

جوايا ضــعف وعنف وإيمان

جوايا غـنوة وفكرةو فنان

جوايا حـكمة وبراءةوجنان

جوايا صـمت وحكايات كمان

جوايا ذكرى وحنين ونسيان

جوايا حلـم وأمل من زمان

جوايا أنا.. جوايا إنسان

Sarah

18-4-2012

دواير....

الدنيا يامــا بتودينا.. ويايامـــا بتـاخــدنا... ترمــينا وترســينا ...تـبـعـدنـا وتـقـربـنـا ... وحياتنا فيها كتييير من الاحداث  اللى بـتـمـر علينا وتغييرات بنتعرض لها ساعــات بمزاجـنا وساعات اكتر غصب عننا ... ونفضل نتنقل من حـال لحال .. ومن مكان لمكان ومحدش عارف الاخر فين ولا هترسى بينا الحياة على انهى بـر....ومن وجهة نظرى الحياة عاملة زى دايرة كبيرة انت بس بتتحكم فى قطرها .. على قد علاقاتك ومعلوماتك  على قد ما بتكون الدايرة كبيرة او محدودة  او ممكن حتى تكون بس فى المركز ومش لاقى حاجة تلف حواليها  عشان توصل لهدفك ... و تفضل تلف فى نفس الدايرة  وتفضل تسعى ورا هدفك لحد ما فجأة تلاقى نفسك بتتحدف من دايرتك لدايرة تانية خالص متعرفش عنها حاجة ولا تعرف حجمها ولا ناسها ممكن تتكعبل فى الاول او متعرفش تتأقلم بس بعد فترة بتاخد عليها وترجع تلف تانى فى الدايرة الجديدة لحد ما يجى وقت ولازم تسيبها وتروح دايرة تانية سواء بمزاجك او غصب عنك لكن دوام الحال من المحال ... لحد ما توصل انك تبقى حريف  فى الحياة وتعرف تتنقل من دايرة لتانية بسهولة وبإتزان من أول لحظة تروح للدايرة التانية تعرف تظبط توازنك وتملك دايرتك الجديدة وتعيش معاها وفيها زى لاعب الكور فى السيرك اللى بينط من كرة لكرة اكيد فى الاول بيقع لكن بعد كده بيعرف ينط بكل سهولة لكنه بيبقى عارف انه لازم هيسيبها ويروح لكرة غيرها عشان تفضل اللعبة مستمرة ووقت اللى مش هيروح لكرة تانية تبقى اللعبة خلصت....

Sarah
30-1-2012

رابط المقال على موقع نون :
http://www.nooun.net/show_article/%D8%AF%D9%88%D8%A7%D9%8A%D8%B1-%D8%A7%D9%84%D8%AD%D9%8A%D8%A7%D8%A9/

مشاوير

مشاوير

مشاوير فى ليل البرد

مشاوير بلون الورد

مشاوير أخرها سد

مشاوير مشيها القلم

يكتب فى فرح وألم

مشاوير تمر فى لحظة

مشاوير تعيشها للحظة

مشاوير تتوها سنين

مشاوير طريقها حزين

مشاوير أخرها حنين

مشاوير أخرها بسمة

مشاوير أخرها دمعة

مشاوير أخرها فرحة

مشاوير أخرها فكرة

مشاوير أخرها حلمك

مشاوير عشان يتصدق

مشاوير عشان يتحقق

مشاوير مليانة  أمل

مشاوير بتمحى الملل

مشاوير تكتب حكاية

مشاوير ملهاش نهاية

Sarah

31-12-2011

ابن الحلال

كترت اوى مدونات البحث عن ابن الحلال وزوج المستقبل وده شئ مزعج جدا بالنسبة لى انى ملاحظة ان اغلب البنات همها الاول والاخير هو الجواز رغم ان فى رأيى ان ده قدر ونصيب ومينفعش نعلق حياتنا عليه يعنى دى حاجة ثانوية فى الحياة فى حاجات تانية كتير نهتم بيها زى الدراسة ولو فى فرصة للشغل ليه لأ ان البنت تحقق ذاتها فى اى حاجة تانية غير بيت العدل...وانا مش بهاجم البنات  ولا بلومهم على تفكيرهم ده لأن دى ثقافة كبرنا واتعودنا عليها منذ نعومة اظافرنا...واكيد البنات وصلوا لوجهة النظر دى من ضغط الثقافة القديمة دى عليهم ان البنت فى الاخر مالهاش غير بيتها ومهما اتعلمت مافيش نجاح احسن من انها تبقى ام .. كل ده كلام جميل بس فى الظروف اللى احنا فيها دلوقتى ده بقى صعب ولازم نواجه نفسنا بالحقيقة دى حتى لو كانت صادمة لكتير من البنات اللى مستنيين ابن الحلال ومش بيعملوا حاجة فى حياتهم غير انهم يحلموا بفارس الاحلام المنتظر اللى عادة بيكون عكس كل التخيلات :) انا شايفة ان مش صح اصلا ان اى بنت تربط حياتها بالارتباط او الجواز او ترتب مراحل حياتها بناء على ميعاد جوازها المفروض كل بنت تتعلم وتنمى نفسها علميا واجتماعيا بالطريقة الصح اللى تؤهلها انها تكون كيان مستقل ناجح حتى لو فى حاجة بسيطة والجواز ده حاجة تكميلية يا جت يا مجاتش وده مش فشل ولا قصور منها فى اى حاجة انما هو نصيب او قدر محدش يعرف ميعاده..وكمان الأهل  المفروض يحاولوا يغيروا من تفكيرهم وثقافتهم فى التعامل مع البنت والضغط النفسى اللى بيمارسوه سواء بالكلام او الافعال وفى بعض الامثلة الاهل بيحرموا بناتهم من حاجات كتير و بيضيعوا عليهم لحظات جميلة من عمرهم عشان هما مستنين ابن الحلال.. محتاجين محاولة لإعادة ترتيب الاولويات والامكانيات ومحتاجين شوية رضا بالحال اياَ كان وفى الاخر محتاجين من البنات انهم يحسوا بكيانهم وذاتهم وحدهم وان هما قيمة كبيرة ومهمة فى المجتمع واكيد كل بنت عندها قدرات او موهبة مختلفة عن ناس تانية أعتقد ان دى حاجات اهم نفكر فيها بدل من الانتظار بلا جدوى.

Sarah

5-9-2011

باب النجار مخلع

من حوالى سنة كنت بشتغل فى برنامج اجتماعى وكنا بنجهز حلقات جديدة ..وسمعت عن مكان اسمه “مركز البحوث الاجتماعية والجنائية” وفرحت ان موجود فى مصر مكان زى ده عشان يحل المشاكل الاجتماعية فى مصر -على حسب ماكنت متخيلة- وصلت المركز وسألت عن مسئولة الاعلام والعلاقات العامة عشان تساعدنى اوصل للابحاث اللى بدور عليها بسرعة..وسألتها عن أول موضوع اللى كان عن اسباب الطلاق المبكر فى المجتمع المصرى واللى نسبته زادت جدا فى الفترة الاخيرة ولو فى إحصائيات وأرقام عن الموضوع للأسف كانت اجابتها انه مافيش اى بحث اتعمل عن الموضوع ده لكن فى ابحاث عن الطلاق عموما وبتركز اكتر عن مصير الأبناء بعد الطلاق وكمان نصحتنى نصيحة مفيدة جدا قالتلى ان انا لسه صغيرة على المواضيع دى وممكن يبقوا يخلوا حد تانى اكبر شوية يعد البرنامج..ساعتها حسستنى انى سألت عن حاجة غلط وانا مش واخدة بالى وقلت مش  مشكلة اسأل عن الموضوع التانى وأكيد ده بقى هلاقى عنه أبحاث كتيييرومش هتقولى انى صغيرة ولا حاجة  وسألتها عن الأبحاث اللى اتعملت عشان مشكلة تأخر سن الزواج والعنوسة فى المجتمع المصرى ؟!! وكان ردها محبط جدا

 قالت :لا اصل ده موضوع مش مهم أوى يعنى وفى حاجات تانية أهم من المواضيع اللى انتى سألتى عليها دى

قلتلها  زى ايه مثلا , قالت البطالة وسوق العمل…ولقيت اكتر من 500 بحث عن البطالة ورغم كل الابحاث دى إلا ان برده المشكلة متحلتش دى يمكن بتزيد كل يوم اكتر من اللى قبله يبقى اكيد حتى الابحاث اللى بيعملوها ابحاث نظرية وكلام وخلاص وسابتنى الأستاذة اللى كانت معايا وراحت مكتبها وانا فضلت فى المكتبة اتفرج على الابحاث يمكن الاقى اى موضوع ينفع لحلقات البرنامج و فضلت افكر ان المواضيع اللى هى شايفاها مش مهمة واللى مافيش ولا باحث فكر يعمل عنها ولا بحث واحد دى أهم مشاكل المجتمع على الاقل فى وجهة نظرى لأن الأسرة أساس المجتمع والطلاق المبكر يعنى هدم أسرة لسه بتبدأ ولو  سبنا المشكلة تزيد وأعداد حالات الطلاق تكتر يبقى فى وقت من الأوقات المجتمع هيحصل فيه خلل لحد ما يختفى تدريجيا , اما مشكلة تأخر سن الزواج سواء للولاد اوالبنات هى برده نفس المشكلة لأن مافيش أسرة هتتكون اصلاً…عند باب المكتبة كان فى مجموعة من الباحثات اعدين مع أمينات المكتبة بيتكلموا فى عن اى موضوع فى الحياة الا الشغل..لحد ما دخلت واحدة معاها شنطة سفر و فجأة اتجمعوا كل الباحثات والامينات دول حواليها  وفتحت الشنطة وطلعت منها وجبات نصف مطهية ومحشى وكفتة وخضار منظف جاهز للطهى وواحدة منهم تطوعت انها مسكت التليفون وفضلت تكلم باقى الزميلات عشان يجوا يشتروا الحاجات دى قبل ماتخلص…وقتها عرفت ليه مافيش ابحاث اتعملت عن اى مواضيع مهمة…لأن الباحثات نفسهم محتاجين حد يعملهم بحث عن مشكلة التوفيق بين البيت والعمل !!!ـ 

Sarah
17-7-2011

My 1st Project on "Finalcut"